每年都有幾百個小股東出席嘅煤氣股東會，噚日首次喺六星級嘅四季酒店開，亦都係第一次唔畀傳媒入場，點解？又係話人多囉！雖則轉咗去自己個場搞，但主席四叔李兆基場內場外都仲係俾人聲討，場外就要求佢減煤氣費，場內就有小股東彈起身話間公司賺就賺多咗，但派息就冇得加。
四叔即時還拖，話「派晒畀你都得，不過公司以後冇得發展㗎啦！」之後又話「我都想派多啲息，我都係股東」。小股東當然話之你，繼續發功，大大聲問在場嘅人「係咪應該要求提升股息？」老細俾人係咁質，剛剛做完眼部手術嘅林高演，即刻出聲護主，控制番個場面。

共捐7,800萬畀兩大學

會後問四叔，被人當面咁話有乜感覺？佢一開口就話「小人意見」，跟住即刻補鑊加多句「唔係話對方小人！」係咪小人都好啦，小股東永遠都係人微言輕，左右唔到大局，難怪有啲小股東講到明，因為未嚟過四季，所以先嚟睇嘢兼食嘢，派幾多息幾時輪到佢哋出聲呀！
至於眼疾初癒，護主有功嘅林高演，喺股東會就聲大大，點知會後記者會，閃得仲快，唔知係咪唔記得帶黑超，所以怕俾攝記閃光燈燦親。
講番四叔，呢排佢喜事重重，除咗有傳佢10月娶新抱之外，佢又先後捐咗4,500萬畀理大，3,300萬畀科大，兩間院校就將大樓及圖書館畀佢命名，噚日四叔晏晝搞完個股東會，傍晚就去咗科大，做圖書館主禮人，同廿個科大生傾偈，講吓做人道理。
學生問佢致富之道，佢話男人最怕入錯行，所以一定揀啱，唔好早婚，「18、9歲就結婚，因為有個家庭負擔，為仔女打工，好難賺大錢。」佢又講句實話，話生意人一定係講錢，要清高就去做校長喎。
至於養生之道，四叔都係話飲食適宜、作息定時，不過70幾歲嘅佢，原來仲每日運動兩個鐘，按摩兩個鐘。

傳真︰2623-9278
電郵︰[email protected]