周日（9日）戲碼疲弱，最大問題是大部分要從弱旅中找出較少缺點的一駒，但講到分頭，又與平日在強組中找到最強者相若，不過揀強中強就硬淨得多，此刻最好小注為妙。

在平淡的賽事日中，身在韓國的「藍天堡馬」帶來一則前所未見的新聞作為點綴。

話說韓國馬會因為該駒出閘曾有問題，以安全為由硬性將牠編第13檔。雖說人家作同樣安排早有前科，但真的想問如果一場有好幾駒起步唔規矩的話，韓國馬會怎樣決定邊隻馬排出排入？

其次，究竟要將一匹馬界定為出閘有問題馬，追溯期有多長？計近五仗、十場定由出賽一刻開始計？如由頭計到尾，恐防有近一半香港馬作客韓國，都要接受「外訪」式招待！

「藍天堡馬」就算排內檔好位，能否應付首爾的沙地也要靠估。相對之下，徐雨石屬香港泥地專家則無庸置疑，周日徐廐第六場四班泥地1200米派出「紫雲星」應戰。

此駒剛周三（5日）跑谷草1200米取得季軍，上季曾以前快後快姿態勝出四班泥地同程，並交出三班贏馬表現指數，兼且「紫雲星」於1月曾試過七日內再跑連捷，今戰有力補中。