耗資近千億公帑嘅高鐵9.23通車，自然係傳媒嘅焦點，但港鐵採訪安排一直為人詬病。為求採訪到頭班車營運情況，一眾記者變身「排隊黨」，周五晚起已帶埋摺凳、鋁梯，响柯士甸站輪候買飛位置馬拉松式排隊。見到一班行家咁辛苦，香港記者協會同新聞行政人員派代表周六到場，同港鐵商討傳媒買飛安排。

記協主席楊健興話，首班車500幾張飛，香港處理嘅只得約300張，記者想採訪同埋市民想坐頭班車，其實係一樣，認為呢啲大型項目，無論港鐵或者相關政府部門，都應該協助記者採訪同報道，港鐵竟然要記者留守排幾日隊買飛，係加重傳媒工作量。

港鐵職員之後向記者派發高鐵車票預售訂購表格，港鐵公關跟住出嚟「撲火」，話會根據登記表格上嘅籌號賣飛，登記好嘅記者可以到賣飛當日按籌號排隊，唔使通宵。至於普通市民現場買飛，就仍然要親身留守排隊，但一啲籌號後過普通市民嘅記者，都要排市民後面，「買飛都係同一條隊」。