【智能家居】智能燈又關雷蛇事？ 全屋燈光配合打機
蘋果日報 2018/12/13 00:03
打機智能家居物聯網雷蛇智能燈
Philips Hue Sync可以把智能燈連接電腦，把屋企燈光跟電腦畫面同步配合，例如打機時中槍時，家中燈光和電腦配件，全都會亮紅光，玩家們一定玩得更投入。
近年興玩智能家居，但其實喺香港，對應嘅產品唔算好多，最容易入門應該就係智能燈。平平哋可以玩Ikea出品，大路的亦可揀Philips Hue，前者勝在性價比高，後者就勝在質素較高亦有更多功能。而最近Philips Hue更進一步提升功能，推出了新的Philips Hue Sync應用程式，可配合原本的Philips Hue App使用，並支援不同電腦系統，把屋企燈光跟電腦畫面同步配合。
在發佈會現場更宣佈會同雷蛇（Razer）合作，並以其電腦及配件合作示範。現場所見，各燈泡會跟畫面配合，呈現不同顏色，無論是睇戲、打機、甚至聽歌都能配合。據講燈光會因應不同因素變色和閃動，其中一個就是根據畫面上的主要顏色而變色，例如睇戲睇到黃昏場景，燈光就會自動變成橙黃色，看到藍天時又會變藍色。當然喇，講得同雷蛇合作，打機亦是重要一環，本身雷蛇好多電腦和配合都有燈光配合，而家加埋Philips Hue，就可把燈光效果進一步提升，例如中槍時，家中燈光和電腦配件，全都會亮紅光，玩家們一定玩得更投入。
雖然現在只有示範播片，而沒有打機，不過可見燈光配合反應都相當快，顏色亦相當配合畫面。以前好多人都話智能燈只係等如遙控，變色冇乜太大用處，而家可以配合電腦畫面，唔知又會唔會吸引到更多人加入智能家居行列呢？
記者、攝影：韓繼聰
燈泡會跟畫面配合，呈現不同顏色，無論是睇戲、打機、甚至聽歌都能配合。
燈光會因應不同因素變色和閃動，其中一個就是跟據畫面上的主要顏色而變色，例如睇戲睇到黃昏場景，燈光就會自動變成橙黃色，看到藍天時又會變藍色。
發佈會現場更宣佈會同雷蛇（Razer）合作。
除了家用，亦有商用，Interact Hospitality就是為酒店而設的智能燈光系統。
新的互聯照明系統除了可有效操控燈光，甚至可以了解使用數據，運行分析和管理。