32歲陳家樂同29歲陳瀅大前晚到中環撐枱腳，《蘋果》記者發現兩人食得開心傾得甜蜜，飯後陳瀅更親自駕駛跑車，鬼祟孖新歡陳家樂返香閨，「雙陳戀」斷正！

大前晚（1日）7點45分，《蘋果》記者趕到位於萬宜大廈嘅食店，發現陳瀅背住門口而坐，陳家樂就面向商場出面，兩人傾到雞啄唔斷，仲不時烏前身咬耳仔，笑得好鬼開心，十足似蜜運中嘅情侶。

大約8點，兩人已經埋單離去，呢個時候佢哋表現得好避忌，着白衫嘅陳瀅先行步出，陳家樂則落後幾個身位，兩人好有默契扮唔識，雙手插袋嘅陳家樂擔天望地，仲刻意望住右邊牆，扮陌生人扮到好唔自然；之後兩人搭扶手電梯到停車場，全程都係保持距離冇傾偈，扮到唔係約埋蜜會咁款。

兩人落到停車場後，急步上咗陳瀅嘅跑車，而負責駕駛嘅陳瀅，將跑車駛到停車場出口時，停低足足20秒都唔開車，好似想睇吓有冇傳媒追訪，而當佢再開車時，由於小路出大路關係，陳瀅打開黑色玻璃車窗一條罅仔，望清楚路面情況，坐隔籬嘅陳家樂都幫手望兩眼，雖然當時冇其他車輛經過，但兩人都喺出口停咗10秒先出車，十分謹慎。

之後由陳瀅做司機，踩行油孖陳家樂返去位於尖沙嘴嘅香閨，《蘋果》記者守候至凌晨12點，都冇見陳家樂離開。差不多同一時間，陳瀅亦有更新ig story，上載一位女性朋友食水煙嘅片段，仲清楚見到對面海有棟ifc，似乎係想聲東擊西。

「雙陳戀」疑於今年8月合作拍攝《廉政行動2019》擦出愛火花，當時陳家樂啱啱先同舊愛余香凝分手兩個月，被問到會唔會同陳瀅有發展機會時？家樂仲話自己係絕緣體：「第一次合作咁快就講感情事，熟絡啲先啦！我哋之前見過幾次，最近開會先至第一次傾偈，佢好肯同我傾偈，好nice。」

估唔到短短4個月，陳家樂已經被女神陳瀅俘虜，「雙陳戀」火速撻着，陳家樂更登堂入室夜訪陳瀅香閨。

精選娛聞，喺晒《娛果》
http://fb.com/appledailyent

【編輯推介】

《造星》一分為二 騎呢4人男團ERROR自撼MIRROR
http://bit.ly/2RtUFjZ

【讀書時曾被非禮】疑遭的士司機偷窺裙底 鄧月平嬲爆鬧：黐線佬
http://bit.ly/2Q9JLU8

【失婚姊妹】江欣燕、江希文由細靚到大 三代同堂晒溫馨家庭照
http://bit.ly/2Ub4vcb

【同病相憐】母女自小冇老竇被人笑 吳綺莉︰多難聽的說話都聽過
http://bit.ly/2QsF4Ef

【救救可仁】大劉捐690萬助罕見癌病兒童 甘比：抗病路上，佢哋並不孤單
http://bit.ly/2KU9ES0