當年今日
關於我們

【《都巿閒情》傳停播】節目改革乜都唔知 林淑敏稱主持會留喺同一時段

蘋果日報 2018/09/12 16:33

林淑敏都巿閒情

「大小姐」林淑敏同「Terry」李偉健今日以「姊弟檔」去到大埔一間連鎖快餐店宣揚惜食訊息,為聖雅各福群會眾膳坊食物銀行及食物援助協作平台Food-Co籌款。佢哋都話自己對飲食不會浪費,林淑敏話:「煮飯會適量,食晒就算,唔浪費。」Terry則話:「家姐經常會萬歲,煮啲健康食物,攞番嚟請我哋食。」
對於有26年歷史嘅長壽婦女節目《都巿閒情》傳出即將停播(新聞連結: https://bit.ly/2oYrxVs ),喺節目中擔任主持嘅林淑敏話:「我哋負責幕前,改革形式未知具體係點,知道主持會留番喺同一時段,收到會繼續做,形式未知,有定案先至會話俾我哋知。」
對於節目將會改名,林淑敏表示:「改名就未知,可能有少少唔同,自己做咗7年,好有感情,會唔捨得,除咗個名有少少唔同,同事都會留番喺度,唔會太傷心,因為製作都需要新元素俾觀眾睇,唔可能一成不變。」
新節目有傳會植入Big Big Shop元素,問到林淑敏會唔會擔心觀眾唔適應,佢話:「內容形式真係唔知,淨係知道主持會保留,所以對於會唔會轉人唔擔心。」對於會唔會擔心流失傳統觀眾,林淑敏認為:「可能傳統觀眾繼續保留,同時吸引一啲新嘅觀眾,有信心新形式會吸引到新觀眾。」
精選娛聞,喺晒《娛果》
http://fb.com/appledailyent
empty
(左圖攝影:林賓尼)
empty
「大小姐」林淑敏同「Terry」李偉健今日以「姊弟檔」去宣傳惜食活動
empty
林淑敏話公司未通知佢哋《都巿閒情》係咪執,但啲同事會留番晒喺度。