【金手指】 抗議其實可有用(孫柏文)
孫柏文俄鋁金手指股東會
上週,孫柏文喺本欄曾經預先宣佈會去上週四嘅俄鋁(486)股東會。亦同時話過我會著住件印有「冇息派、冇偈傾、Where's Our Dividend?」嘅T恤去。
首先,我諗住分分鐘俾「實Q」,連入場都冇機會嘅情況下,居然順利畀我開會。而到股東發言時間,我第一個舉手,又即時遞咪畀我。我一起身,在場人士見到我件T恤,已即時笑一笑,咁我就開始講。
你知啦,我哋呢啲香港人,當主辦單位聽意見嘅panel坐咗梁愛詩(俄鋁獨董)喺度,心裡都會有個佢哋將會當我發噏風嘅感覺。不過,我都照樣分享對業務、現金流、俄鎳股權等嘅睇法,特別係喺舊年,我哋呢啲香港股東都受盡欺凌。有啲被迫轉行,有啲被迫提倉,有啲甚至被迫沽出後,轉行再買。不離不棄,忠心如一。
我講晒我啲觀點後,最尾就問:「所以今日我條問題係,我哋啲派息呢?」一問,在場嘅股東們,即時熱烈鼓掌!我好滾動啊。
佢哋嘅財務總監答,計過數,如果鋁價喺現水平企穩,就應該派。咁佢哋歷史中都係每年中期業績派一次息,即係可解讀成鋁價到八月尾,董事局坐埋睇中期盤數時唔再跌,就會派。
當然,呢啲都係估估吓。我覺得佢哋會派嘅最大理由,就係主席Zonneveld一宣佈散會,就即刻走埋來搵我傾。而當我問佢可否合照時,非常歡迎(上週五李華華登咗上報)。試問,一個二月先上任,到中期都冇派息諗頭嘅公司主席,會唔會敢一散會就搵著住嗰件T恤嘅股東傾偈合照呢?咪就係囉。市民抗議多數唔work,希望股東抗議得啦。
孫柏文
-----------------------------
你撐蘋果 我捐$1
支援反送中抗爭者