由舒琪監製、本屆「鮮浪潮」電影節最佳導演李駿碩首次執導既電影《翠絲》（港版《丹麥女孩》），原來除咗有「黑仔」姜皓文飾演變性人，一向為同志平權發聲嘅人民力量立法會議員「慢必」陳志全，原來都有參與演出，相信2018年就有得睇。

八方問過慢必，佢話下周三立法會今年嘅會期結束後，就會去參與演出，解釋今次接拍嘅主要原因，係因為已經十幾年無拍戲，片中佢會做返議員，開記招為受人歧視嘅性小眾人士發聲。

咦，乜佢以前拍過戲？如果咁問，證明大家仲好年輕。皆因慢必加入政壇前，做過DJ㗎，佢話過去都拍過至少5套戲，包括喺《古惑仔：龍爭虎鬥》做拳術旁述、唔少人奉為港版CULT片嘅《生化壽司》，佢都有粉墨登場，仲有喺黎明同劉嘉玲主演嘅《新戀愛世紀》做牙醫護士，第四套就係《超級整蠱霸王》。至於最後一套，就係朱茵同張家輝有份拍嘅「緣份有TAKE TWO」，佢喺片中扮神仙。