要數阿仙奴(圖)近兩季最最最值得研究嘅球員,應該都係奧斯爾。有人話「大眼仔」唔適應英超搞到好易俾人踢傷、又有人話雲格無擺佢喺最佳位置,更加有人話佢高峯期已過。其實,原因可以有好多,但係到尾都係得出一個結論,就係佢嘅表現,真係好唔穩定!作為阿仙奴球迷,我當然對奧斯爾有好大期望,話晒佢係世界盃冠軍隊成員,喺皇馬同德國隊都交出好多靚助攻,睇數據好應該成為兵工廠重心。可惜,除咗上季啱啱加盟時有幾場踢得好,一過咗蜜月期之後,佢就好似「食錯藥」咁, 水準一直差落去,就連眼都變細埋咁。呢位中場,已經由球迷眼中嘅寵兒,變成最唔想填落正選名單嘅球員……
上場對阿士東維拉,奧斯爾終於發威,一個入波加上一個助攻,表現好似有啲轉機,應該可以開始令批評佢嘅人收聲!雖然唔知奧斯爾今星期會「上身」定係無表現,會唔會再出現好多批評佢嘅聲音,但「大眼仔」係作為職業球員,就應該用雙腳去代替說話,為自己爭口氣!