噚晚播映的《星夢傳奇》參賽者包括港姐冠軍張名雅、「關二嫂」黃智雯、「關二哥」梁烈唯、張文采男友羅鈞滿、港男袁偉豪、「家明」張景淳，以及寂寂無名嘅鄭俊弘，但經過噚晚一役，相信好多人對「鄭俊弘」呢個名加深認識。

噚晚鄭俊弘唱陳奕迅《時代曲》，獲全場最高分，評判葉蒨文俾佢97分，佢叫俊弘留意丹田運氣，就連出名嚴謹嘅巫啟賢都俾佢80分，巫sir叫佢注意發聲技巧，連EricKwok都叫俊弘唔好做演員，不如去唱歌，全部係正評!

現年29歲，洋名叫Fred嘅鄭俊弘，其實真係唱家班嚟0架，仲有唔少，最愛歌手係張學友，俊弘喺2001年（即當年17歲）已參加《全球華人新秀歌唱大賽》，當年佢向高難度挑戰，唱鄭中基嘅《天意》，當年仲獲得「現場最具風采獎」、「突破新秀巨星演繹獎」以及「網上完美之聲大獎」，當年參賽者仲有戴dreamdream（戴夢夢）呀，真係十年人事幾番新!

不過之後俊弘成為無綫藝員，2004年演出《青出於藍》裡飾演學生 「馮恩東」 一角漸漸被人所識，及後佢參演《法證先鋒》及《法證先鋒II》，飾演蒙嘉慧胞弟，雖然認得個樣，但未必講得出佢個名。另外，俊弘仲同沈頴婷及姜麗文爆過緋聞。

雖然成為無綫藝員，但俊弘冇放棄過唱歌，而且佢仲識彈琴﹑結他同打鼓，兼且係Band友一名，佢曾講過想做歌手。

喺2010年，佢就喺朋友一個婚宴上自彈自唱《為你鍾情》﹑《Wonderfultonight》﹑《Flymetothemoon》，唱得真係唔錯，嗰樣仲好陶醉添，YouTube都有片睇0架；此外，佢亦喺《荃加福祿壽》模仿過鄭中基嘅《無賴》，咦，又係鄭中基喎。

俊弘噚晚一鳴驚人，相當淡定，相信同佢過往演出經驗不無關係，難怪表現超班，唔知嚟緊佢會唔會再以鄭中基或張學友歌曲參賽呢？最後佢又會唔會成為總冠軍？無綫會唔會幫佢出唱片呢？

俊弘，加油呀!




一句到尾，《亂噏24》！
倪匡、蔡瀾同肥佬黎約埋高談闊論，第一集仲有宅男女神周秀娜低胸迎戰，嘩！
7月11日起，逢星期4晚11點，蘋果網站動Live預埋你。 http://bit.ly/14Bg2SP