陳煒、黃翠如、唐詩詠等噚晚喺將軍澳現身一個晚宴活動，陳煒同楊千嬅合作劇集《多功能老婆》日前煞科，卻有報道指陳煒因為千嬅遲大到，等到陳煒好嬲（新聞連結： http://bit.ly/2R4nL9P ）。

陳煒平心靜氣澄清：「完全冇，同千嬅、朱晨麗戲中演閨蜜，現實都係，私下話題講着衫、扮靚，佢仲介紹美容儀器俾我哋，乜都傾。」陳煒力挺千嬅平時都冇遲到，係有品德演員，即使有戲疊住都會趕到來，而且一開機埋位就好精神，試過三頁紙一take過，好專業值得敬佩。問到遲到嘅係咪另有其人？陳煒話：「冇呀，通告去到點都要等，有時等兩個鐘，大家都要等 ，每個都有品德。」陳煒完成拍攝後暫時小休，稍後才開拍新劇，有個短短假期，但就嘆搵唔到人陪去旅行，但近日喺屋安裝咗卡拉OK，笑言可以隨時練歌登台。

陳煒讚千嬅有品德，佢本人其實都有口德，因為千嬅噚晚喺《麥路人》嘅感謝宴時，親口認自己遲到過，仲話：「的確係有三、兩次遲到過，都係10分鐘內。」之後仲笑笑口話：「我等嗰啲時間就唔係時間咩？」（新聞連結： https://bit.ly/2NPyNBZ ）

精選娛聞，喺晒《娛果》
http://fb.com/appledailyent