某日夜晚，一行7人嘅師奶聚舊團帶咗張8折coupon嚟walk-in。師奶們一入嚟就已經好嘈，例牌又揀下位呀，驗下個位係咪大風呀等等。不過佢哋又唔算係好無禮貌嘅，只係好嘈，派餐牌都有幫手傳。咁大家坐好晒，我就開始講解今日啲daily special同埋一啲in house優惠。其中一個師奶應該係leader啦，佢就拎咗張8折coupon出嚟示意佢哋有呢個優惠啦。咁我就同佢哋講解返優惠都係只能用一個，我個人覺得8折抵過其他啦。咁佢哋都同意之後，就自己慢慢睇咗陣餐牌，當然同普遍客人一樣都會check 下openrice嘅相同推介啦。

無幾耐，leader個師奶就開始嚟料，喺度搞氣氛又搞gag啦，之後就叫我介紹下個餐牌嚟聽下啦！話佢班朋友好少出街食飯，仲要食西班牙菜，叫幫下佢哋手啦！咁除咗講招牌菜，大枱我都會建議客人叫嘅份量要double，特別係啲tapas（西班牙小食）。因為有啲item只係得兩粒，好難分夠7個人。之後我又再畀時間佢哋考慮我嘅建議。

到落單嗰陣，佢哋只係叫咗兩份小食、一個飯同一份肉，同一個二人枱order差唔多。我再提醒多次師奶們份量真係好細，一定唔夠飽。之後leader姐話，佢地叫住先，一陣會再加。

好啦……當食物嚟到，全枱人都話啲份量好少！開始啲黑面樣出晒嚟！Leader姐叫咗我埋枱。

Leader姐：「我真係無諗過會係咁少囉啲嘢食！喂！大佬你哋收唔平㗎喎！」
我：「小姐因為tapas都係小食嚟，都會係1-2人份量。」
Leader姐：「係啫，就算係一人份量，咁都可以畀嗰一個人食多幾啖㗎！細碟成咁真係賺死你！」

哇，你咁講，乜都可以話一人份量啦！一人份量但畀你食成1000啖好唔好？

我：「小姐，或者你可以叫大份少少嘅tapas嘅。」

呢個時候，個飯嚟咗，佢哋成枱起哄，係咁話：「哇！兒童餐呀！」
Leader姐：「哇！你呢間餐廳真係唔得囉！有乜理由飯都咁細碟呀！痴線㗎喎！主菜嚟㗎喎！一個人都食得晒啦！」

我：「小姐，查實我哋個飯係middle course，唔係主菜，同埋我哋lunch都係serve呢個份量，真係畀1-2個人食。」
Leader姐：「哇，真係救命，餓死都返唔到屋企。」
我：「小姐，你不如叫XXXX同埋XXX啦。呢啲都係飽肚同大份啲。」
Leader姐：「（望餐牌）哇，咁貴！唔使啦！仲有。點解你哋無麵包畀客食嘅？又話係西餐！」

我終於都明點解阿leader姐要提醒我，佢班朋友好少出街食飯。（查實阿leader姐都差無_幾）我講嗰兩個course $200都唔使，仲要係除7個人，都仲嫌貴。我真係想知上次聚會佢哋係咪去某西餐廳，淨係食人哋啲免費包叫一個starter就算⋯⋯

（待續⋯⋯）

專欄作者簡介：
The Beggar in the Restaurant 店小二Mary
我係一位從來唔對客人黑面，經常笑面迎人嘅侍應，著有《乞客MENU》。

Facebook專頁：The Beggar in the Restaurant乞客
https://www.facebook.com/BeggarintheRestaurant/


發掘更多身邊的小城故事，請LIKE 蘋地 Facebook Page，並設定為「搶先看」： https://www.fb.com/appledailyland