二手交投淡靜，配合鋤價絕技，隨時可以執平貨。資深投資者吳龍飛教路，二手樓「鋤價絕技」精髓在於「角色扮演」，不能向經紀透露職業及對單位有幾鍾情，有需要時甚至要用上演技，塑造「好慘」形象。

吳龍飛表示角色扮演尤其重要，首先不能讓經紀知道自己的職業，「如果你做律師，你鍾意呢件貨的話，佢就可以加價啦」，即使你有幾心儀這個單位，亦絕不能透露半點；此外，要讓經紀知道「唔到我心目中價，我會幫襯其他地產經紀」；第三，落票限時三日，務求以最理想價錢入市。

倘要認購新盤則要清楚佣金有幾多，吳龍飛表示，「有3隻佣，咪回2.5隻佣…好多經紀連0.5佣都照殺。」他續指，要求回佣時，要物業代理公司簽紙作實，「萬一經紀走咗佬，佣金拎晒」，買家口講無憑，隨時變成苦主。

麒豐資本創辦合夥人洪英偉則傾向與經紀保持友好關係，「一買一賣看似簡單，但如果搵到一班好嘅代理幫你出入貨，你賺到嘅錢其實咪當代理分少少中介費囉！始終物業買賣好難直接與業主洽談」。他更提議睇樓時不妨與不同代理交流，從中找出「真正理解屋苑、格局」，而且又盡心了解業主情況的代理，得知業主買樓原因，鋤價時可事半功倍。

「動之以情」、「眼淚攻勢」亦是其中一個有效招數，吳龍飛直指要塑造「好慘」形象，「同業主講，啱啱上車好慘，筆首期都係父母畀...仲要自己喊埋」，更大爆有學生曾成功以此方式感動業主，卒之買入價平近30萬元。

中原地產東涌映灣園第四分行分區營業經理陳旭明補充，若買家肯落多一些訂金，對計劃換樓業主較為受用，又提醒睇樓時絕對不要狂踩單位，「曾有客戶鋤單位漏水、又爛又殘，住咗咁多年，最終業主為咗啖氣轉售予另一個出價低10萬元的買家」。他又指，有些買家會投其所好，「賣家見啱key，啱嘴形，甚至大家都是教友，反而傾平咗」。

不過，吳龍飛則指「我最鍾意買垃圾貨，愈漏水我愈鍾意」，「漏水可以解決到，最緊要平」，故堅持一定要狂插單位差，認為這是鋤幾十萬元的機會，「業主應該用化妝術，咁咪唔使畀人壓價囉！佢依家咁殘，預咗畀人壓價」。陳旭明反認為，「如果市淡就會（易鋤價），否則業主真係為咗啖氣（唔賣）。」

有觀眾留言問「香港廢青嫌買樓貴，看不到未來，你怎麼看」，吳龍飛即表示，「佢哋會望到未來，因為咁多暴動，樓價又開始跌…」他又指，今日未能上車，樓價暴跌四成後，就有上車機會，不過當眼見樓市跌四成，年青人會更為擔心要面臨失業風險，未必敢入市，一再強調「買樓唔關廢唔廢青事，喺心態上夠唔夠強」。

【理財急call】二手樓執平貨？ 鋤價絕技大揭秘

日期：9月12日（周四）
時間：10pm – 10:30pm
主持：Willa
嘉賓：麒豐資本創辦合夥人洪英偉
嘉賓：資深投資者吳龍飛
嘉賓：中原地產東涌映灣園第四分行分區營業經理陳旭明
內容：大行、樓市專家紛紛睇淡後市，預期本港樓價至少跌一成。既然大市會調整，現時如有置業需要，就必需具備鋤價本領。兩位資深投資者亦會分析業主心態，教你輕鬆、萬無一失的鋤價攻略，助你以「較合理價」上車，我們亦請來中原地產東涌映灣園分行分區營業經理陳旭明同我哋搵吓區內筍盤!

重溫網址：
果燃台
https://hk.feature.appledaily.com/goodestchannel/video/5d7a5bebf725d40005b18346
蘋果ATM
https://www.facebook.com/appledailyatm/videos/643048442884978
蘋果YouTube
https://youtu.be/qgnOTKlQR90