王菀之將於本月17日在紅館開騷，曾經在電影上有新嘗試的Ivana，今次在演唱會上的造型上亦有大膽突破，日前她邀請著名導演Vernie Yeung拍攝舞台用的短片，在片中，向來白雪雪的Ivana化身黑炭頭，連耳、鼻窿也不放過，出來效果令人譁然兼震撼。不過在2012年，鄧紫棋（G.E.M.）在《What Have U Done》的MV上，亦曾經出現過黑炭look，當時G.E.M.全身包括頭髮都用塗料髹黑，還要被牛奶照頭淋，認真巧合。

忍住眼淚拍攝

提到今次的嘗試，Ivana坦言差點認不出自己，她還說：「化妝師好有心，幫我打咗好多層護膚底，然後先再上色，我第一次變身黑人，覺得自己瘦咗好多，反而導演要我戴上一副白色嘅隱形眼鏡，我就即刻叫救命，基本上冇戴過隱形眼鏡，工作人員幫我戴咗，我就不停流眼水，佢哋話呢啲變色眼鏡係比一般硬，最慘仲要忍住眼淚拍攝，因為一流眼淚水會整花個黑色妝，好彩最後都完成到！」Ivava戴上的一頂大帽，亦令她大叫辛苦，因為帽子重量令她額頭壓出深痕引起頭痛，所以拍攝期間她有試過要求停拍休息。
對於這個花了近十小時拍攝的工作，Ivana說：「因為導演話要保密，所以暫時唔可以同大家分享我喺影片裏面做咗啲咩，我只可以講拍嗰陣我好震撼，從來未試過做啲咁出乎想像的動作及作為，雖然過程辛苦，不過睇番play back，就覺得真係物有所值。」
撰文：張曦彤