黃曉明噚日到尖沙嘴海港城出席「新春抱抱財神」活動，呢個活動之前連續8年都係搵佢老婆楊穎（Angelababy）做嘉賓，因為Baby就快生得，所以曉明做愛的替身，仲帶埋媽咪亮相，而曉明媽見到現場有扮成小雞嘅BB，都忍唔住抱嚟玩，恨抱孫恨到出晒面。
大會送上集合Baby多年嚟抱財神嘅相簿、如意糖果全盒畀曉明，又請嚟兩個打扮成雞仔嘅BB畀曉明抱，曉明笑住話：「今次不只有財神，還送子！」曉明又話今年好開心，因為老婆有咗「小Baby」，但自己就緊張到瞓唔着：「每天莫名其妙的開心、興奮，嘴也帶着笑。」Baby一直都冇公佈究竟陀仔定女，曉明繼續保持神秘，話仔女都鍾意。

拖實媽咪

另外，曉明母子喺活動前，同幾個助手一齊喺附近一間酒店行出嚟，有粉絲要求合照，曉明都有求必應，仲抱起個幾歲嘅小朋友影相。而活動結束後，曉明同媽咪去咗金鐘港麗酒店，沿途有數架採訪車跟住，佢哋試圖想撇甩採訪車，但唔成功。落車嗰陣曉明拖實媽咪，認真乖仔。
撰文：馮仁昭