【更新內容】
連鎖童裝店Chickeeduck本月中起在荃灣愉景新城分店擺放「民主女神像」，惟商場先發警告信要求搬走雕像，昨晚（29日）更發電郵通知不予續租，要求Chickeeduck 21日內搬走。商場一方辯稱不續租是商業決定，商場從未簽訂任何續租協議。Chickeeduck老闆周小龍出示本月3日與商場的電郵，顯示商場和Chickeeduck確認續租到9月底。周小龍斥，大業主新世界今次決定是典型政治打壓。他指，因「港版國安法」生效在即，即晚將雕像移離。

Chickeeduck老闆周小龍晚上到愉景新城分店會見傳媒。他說，自本月16日起擺放民主女神像後，翌日遭商場發信警告有關雕像「唔夠first class」要求移離。當日他已開始不停聯絡業主，但業主以沒有會議室等為由，令雙方至今仍未能會面，「17號封信我都係社交網站睇到，我問佢點解我收唔到，事後先send返畀我。我覺得好荒謬，你覺得個擺設有問題，點解你唔正面同我傾，而係一路迴避我？」

周小龍說，食環署和消防署人員上周曾到分店視察，均表示雕像沒有問題。隨後又有公關公司職員來電，聲稱代表業主「傾租約」，「好奇怪，我話租約好多confidential嘅嘢，想同業主直接傾，但佢話已經唔係租約問題，係公關危機」，該名公關更表明，業主要求店舖移除有關雕像，「業主先會同你傾個租約」。

電郵寫明已接受續租

不過周小龍表明，業主早在6月3日已和他達成續租協議，但未簽訂正式合同。愉景新城6月3日曾向周小龍發電郵，清楚列明租約延續至今年9月30日，並寫明已接受續租（…we are pleased to inform you that your proposed extension offer has been accepted by the Landlord），又指會盡快準備續租手續（we shall prepare the leasing formalities for your execution asap.）。

周小龍說，業主昨晚突然告知不再續租予其分店，他要求見面，「你哋兩個禮拜前先續約，點解而家反口？乜咁無合同精神架咩？」業主至今也沒有再向他作任何解釋。他批評，業主新世界這次是典型的政治打壓，感到十分可悲，「我做零售超過30年，第一次經歷到有業主因為政治原因而唔續約」，又指今次或者是香港市場首次因政治理由而不續租的事件，「一個咁大嘅集團打壓小型連鎖店。香港真係進入新世界」。

周小龍又稱，Chickeeduck愉景新城和K11 Musea均有分店，惟這兩間在新世界旗下商場的分店在眾分店中，生意額都排包尾，反指新世界既然因為政治立場不同而將他打壓，「不如你打壓埋我K11 Musea間舖，嗰度生意好差，係死場嚟，嗰間舖我真係唔想要」。

周小龍估計，新世界明顯熟悉走法律罅，暫時不打算用錢和新世界打官司，炮轟坐擁龐大財力新世界，不但不為香港人說句公道說話，「反而調轉頭嚟打壓小企。既然愉景呢間分店生意排第尾3、4，K11 Musea嗰間排第尾，我根本不屑再同佢哋做生意。既然你話政見不同就離開佢個場嘅，我完全無問題，咪做細啲個生意囉。我依家企出嚟發聲，係希望未來啲人當係榜樣，中小企喺大是大非前係重要。我少兩間舖頭，尤其係政見不同嘅業主，我一啲損失都無，痛都唔痛」。

考慮參選功能組別

惟他說，分店突然不獲續租，預計4至5名職員會被裁減，因21日內難以找到其他舖位重新開業或將人手調配至其他分店。他又指，因應「港版國安法」即將生效，決定今晚就將雕像移走，以保障公司和同事。至於會否擔心國安法後，面對更強力的打壓，他則指連《國安法》條文也未知，無法「盲撐」。被問到會否退出黃色經濟圈，他則表明「零憂慮」，但會更加小心，以免觸犯法例，「但我推行民主、畀細路哥早啲接觸民主嘅意念係唔會停，唔會畀佢打壓到」。

周小龍指，雖然只是擺放民主女神像僅半個月，亦因此被不獲續租，「但99%係得，冇諗過客人咁支持。1%係失，就係搞到同事失業」。

周小龍又說，早前曾參與泛民初選協調，結果發現不少更能幹的年輕人可參與直選，「唔使我呢個56歲嘅人」，但部份多年來一直是自動當選的功能界別位置，「我會考慮」。

早前報道：
愉景新城Chickeeduck擺民女像撐民主自由 商場警告涉違約促移走
Chickeeduck大股東為港區人大胡曉明 辭任董事家族盡沽近6成股份

-----------------------------
蘋果25年系列ebook《讀果》上架：紀實現場 、世界前線 、逆權之路 、叱吒風雲 、守護真相
-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多