四重彩重新推出以來深受歡迎，事關就算開出正路賽果，亦有不俗分頭，而且最近頻頻爆冷，派彩更加吸引。尤其是編於三T次關之四重彩場次，近期便成為爆冷溫床，單係近11次賽事，當中十匹大熱門三甲不入，而且經常有巨型冷門入圍，喜歡「刀仔鋸大機」嘅朋友，值得動動腦筋，搵隻冷馬博巨獎。
翻查紀錄，近三次三T次關之四重彩場次，原來例有幾位季尾才客串之澳洲騎師上名，大前次由客串一日之郭立基策「多綵」爆43倍入Q，前次布文贏51倍「江山如畫」，剛戰就見貝湯美與李富之「金碧陽光」及「踏雪無痕」包辦位置Q。
本周三(11日)三T次關之四重彩場次，即第五場三班泥地1200米，不妨向「爪黃飛電」及「皇仁勁駒」埋手，前駒配貝湯美，此子今季在沙田策時廐馬三次未失獎金，確有變身可能。至於用李富的「皇仁勁駒」，三次跑泥地夜賽全上名，有冇諗過用呢對馬作為四重彩雙膽呢？