陳茵媺為陳豪三年抱三，先後生下兩子一女，過去她一直相夫教子，並於前年7月約滿無綫後離開，翌月拍攝杜汶澤賀歲片《開飯啦！》。不過，陳茵媺照顧小朋友之餘其實亦愛演戲，去年4月她為陳豪生下細女Camilla後，終於在近日復工接拍導演劉偉恒新片電影《日月星》。

電影背景為90年代校園生活，陳茵媺飾演一名英文老師，與湯怡和原島大地等有不少對手戲。昨日陳茵媺正式復工，於清水灣三育中學與原島大地等開工，穿套裝及戴上眼鏡的陳茵媺一身教師look，她揚言重新投入拍攝工作覺得很開心：「雖然開頭第一、二個場口有少少唔習慣，但好快就適應到，雖然唔係拍咗好多年嘢，但我好鍾意拍，所以適應得到。」
陳茵媺透露今次演原島大地的老師，會教對方追女仔，她笑說：「雖然我角色係教師，但一啲都唔惡，係比較嚴肅啲啫。」重新工作會否不捨得家中三子女？陳茵媺說：「都有㗎，我出門口嘅時候佢哋就黐住我，問我去邊度。尤其係大仔同細女特別黐身，係咁問我媽咪你做乜嘢㗎？你去邊呀？我要解釋畀佢聽媽咪係actress，跟住佢哋就繼續問what is actress？會一路問落去。」
陳茵媺又透露老公陳豪剛剛完成手頭上劇集《誇世代》演出，現可以留在家中休息兼湊仔，她說：「雖然話休息，但其實湊佢哋幾個都好攰，不過我知道佢好enjoy嘅。」

兩年前陳茵媺離開效力9年的無綫，問無綫可曾向她招手回巢拍劇時，她承認有接觸，但已婉拒：「有同我傾過，但拍電視劇時間比較長，一拍就要三、四個月，而且要朝早夜晚接住咁怕，比較難安排。」問日後豈非再難見到她與陳豪夫妻檔演出？陳茵媺說：「要睇時間睇劇本啦，唔會話冇可能嘅，係都要睇吓點安排。」
陳茵媺表示除今次電影外，也有不同的工作接洽，但會以照顧三子女為大前提，她說：「其實我同阿Mo（陳豪）都會盡量就時間，盡可能保持我哋是但一個家長照顧佢哋。」她又表示早前開始勤做運動，現時已可穿回00碼的衣服。
採訪：曹家誠
攝影：陳慧安