做得天王嫂，做好多嘢都會有外傭代勞，但係有啲嘢都係親力親為比較好，好似天王劉德華嘅太太朱麗倩，日前就被雜誌影到佢去咗花墟買嘢。

雜誌指當日華嫂去到旺角花墟，同行仲有妹妹朱麗華、三個親友、兩個保鑣同司機，花墟嘅人數都唔少，但係因為華嫂一向低調，仲素顏戴晒口罩咁，所以都冇乜人認得出華嫂，反而同行嘅保鑣就好緊張，一有人行近華嫂，就一定「望到實」。最後華嫂入咗一間鋪頭，流連咗個幾鐘，就買咗四張「招財進寶」嘅年畫。

據報道所講，生肖屬牛嘅劉華於羊年沖正太歲，所以愛夫深切嘅朱麗倩，除咗買年畫外，仲買咗唔少賀年裝飾及風水擺設，祈求幫劉華化煞。