自由黨楊孝華佔據旅遊界議席多年，出年終於退落嚟，肥水不流別人田，自由黨梗係想搵人接班，田少想旅遊業議會總幹事董耀中接棒係公開秘密，不過黨內最少有一把唔同聲音，就係酒店業主聯會執行總幹事李漢城。知情人士爆料，指李漢城同黨高層表態想參選時，話自己10年前已想去馬，不過楊孝華在位，惟有等吓啦，點知三年又三年，等到楊孝華唔做都未輪到佢，有冇搞錯。
白等10年有乜心情，睇過《無間道》嘅人應該好理解。八方聽聞有人向黨高層扭計，聲言此處不留人，自有留人處。邊處？民記囉，事關有人同民記某高層兄弟好friend，有猛人穿針引線，蟬過別枝話咁易。李漢城同八方講，黨內冇人同佢傾過參選嘅事，民建聯亦冇向佢招手。民記中人則話黨內人才濟濟，唔使搵外援喎。