日本上位男星野村周平嘅演藝事業，被唔少圈中人一致睇好，拍完富士台慶劇《年輕人們》冇耐，工作量簡直排山倒海，尤其喺影壇仲零舍搶手。

野村周平同出爐年輕影后二階堂富美，合演嘅新片《每日搖滾》，下月底就會喺日本上映，野村為忠於原著角色，要剝衫上演全裸夾Band場面，相信會同二階堂擦出唔少火花。

套戲話晒講夾Band，野村同二階堂、竹中直人等一班拍檔，早前就入錄音室，為《每日搖滾》嘅戲中歌曲錄音，仲會收錄在11月初上市嘅原聲大碟入面。

野村開始為新片瞓身宣傳，前日就一口氣接受20間媒體訪問，難怪噚晚喺twitter上載攰到反眼嘅自拍照。

至於二階堂近日又捧獎，佢同池脇千鶴齊奪「第6屆TAMA映畫賞」嘅最佳女演員，妻夫木聰就贏得最佳男演員，而《海女》主角能年玲奈，就獲選最佳新進女星。