金管局有筍工！早前政府宣佈招聘約40名政務主任（AO），月薪逾4.9萬元，大家睇到嘩嘩聲，原來入到金管局做見習經理或見習經濟師，月薪都有4萬元；做滿兩年，表現理想可獲聘為經理或經濟師。
好多大企業都有見習人員（MT）計劃，藉以栽培一班年輕人，他日可以成為公司管理層，金管局就喺成立翌年，即係1994年開始推行MT計劃。

當年部份見習經理一直留喺金管局，甚至升到做部門主管、助理總裁。現任助理總裁（外事）李永誠就係首屆MT畢業生，佢1994年加入金管局，2001至2004年間，曾擔任金管局前總裁任志剛嘅助理㖭。
佢好坦白咁講，當年申請做見習經理，只係因為薪金吸引，冇想過中央銀行嘅工作係點，不過竟然一做22年。多年來，佢做過經濟研究、銀行監理，甚至外派金管局駐紐約辦事處，認真經驗豐富。
佢畀貼士有意投考嘅人士，因金管局制訂政策時，要兼顧多方面，同對市場嘅影響，因此見習經理要保持好奇心，搵唔同資料，常動腦筋。
金管局招聘廣告講明，要求應徵者「廣博通識，善於應變，擁有細緻心思和精密的邏輯思維，能多角度思考」。金管局今年亦新加見習經濟師，培養對經濟研究有興趣嘅年輕人。