文仙尼啱啱獲邀加入拉素董事局，係意甲歷來首個教練兼球會董事，呢方面嘅成就足以媲美曼聯嘅費格遜。我求大俠都算睇住文仙尼出道、成名、失意，家陣佢咁威水，大有機會做新一代球壇教父，感慨良多。
咪以為文仙尼平步青雲，以前無論佢響國家隊或者森多利亞踢得幾好，總有隊友鋒芒蓋過佢。好嘞，明明退咗休，又為咗幫艾歷臣了解英格蘭足球兼自己學法，特登去李斯特城踢過幾場波，俾人笑姣婆守唔到寡。後來教費倫天拿好好哋又因為隊波無錢，愈教愈衰黯然辭職。
返到拉素教波嘞，又睇住球會無錢而賣主將，成班波為個錢字惶惶不可終日。到今日球會財困壓力暫緩，佢又入到董事局話吓事，老土講句真係撥開雲霧見青天囉。

意球員竟遭球迷放炸彈
意大利波暴力事件愈鬧愈大。早幾日有兩個丙組艾維連奴球員俾球迷圍毆之後，前日重有個炸彈擺響一個艾維連奴球員嘅屋企。無記錯今年意大利已經三番四次發生暴力同埋恐嚇事件，你話球員想安心踢波都難。聽講球員聯會醞釀罷踢，係就大件事。

好嘢！Dailysoccer網站重開
足球網站Dailysoccer（www.dailysoccer.com ）開番啦！以後又多番個渠道搵多啲堅料同大家分享吓。呢個網站除咗會登一啲通訊社足球消息外，自己都會發放一啲獨家新聞，資料覆蓋面好大，最啱啲唔想抄太多網站嘅懶蟲睇。當然啦，我求大俠只不過推介個好網站畀大家，絕對唔會單靠呢個網站攞料，你估我博炒咩？