鄧小巧今日喺商台宣傳新歌《心靈作家》，佢話好多人會收起自己不快樂，講大話去呃自己先可生活到。問佢有冇呃過自己？小巧話：「唔會冇，遇到唔開心，又冇時間去崩潰，所以有時會一次過爆。」怕唔怕有情緒病？佢表示：「之前有段時間好驚自己會死，死於意外，或者得到怪病，好缺乏安全感，其實我出咗第一張碟之後就有呢個諗法，於是我同藍奕邦傾，講咗出嚟就冇事。」

小巧指新碟預計年底推出，問佢有冇諗過搞音樂會？佢話：「我想儲有20首歌先，因為自己o依家太少歌，同埋我想準備好啲先去表演畀大家睇。」

此外，鄭世豪今日亦有現身商台宣傳新歌《完場前》，佢話係第一首自己作曲嘅派台歌：「大家聽完都覺得OK，所以我唔緊張，呢首歌係講勇敢踏出第一步。」佢仲話同當年佢由演員轉型做歌手一樣：「一日未完場都有扭轉宿命嘅機會。」

鄭世豪透露新碟計劃明年推出，但音樂會就預計年底或明年初舉行，會唔會練大隻騷肌？佢笑住話：「我應該唔使，我覺得fans唔想睇。」