香港女足前鋒張煒琪遠赴澳洲，效力女子澳職（W-League）球隊布里斯班獅吼，今季「W咧」啱啱完成常規賽，獅吼喺周日煞科戰喺主場4:1大勝坎培拉聯，鎖定冠軍，出戰季後賽爭取重奪總冠軍后座。
27歲嘅張煒琪，喺上年勇闖澳洲球壇，試腳成功後獲獅吼簽入，仲畀佢着9號球衣，足見球會對佢嘅重視。張煒琪喺上年10月「W咧」開鑼戰就以正選披甲，踢足全場仲交出一次助攻，幫獅吼以3:1作客擊敗最大競敵FC悉尼。到第二場煒琪繼續擔正，仲幾乎開齋，喺主場對珀斯光輝場波，隊長寶瓊安妮近門頭槌攻門，個波頂中張煒琪背部再彈入網，可惜賽會最後將呢球入咗寶瓊安妮數。

七次正選惜未開齋

周日第14輪亦係最後一輪聯賽，獅吼主場迎戰坎培拉聯只要唔輸就足以鎖定常規賽冠軍，結果主隊喺上半場已經領先兩球，加上後備入替嘅萊特喺完場前連入兩球，終以4:1大勝對手；球隊亦以12戰九勝一和二負28分成績，以三分之差力壓FC悉尼，歷來第三次贏得常規賽冠軍。煒琪喺今場波被列為後備冇機會落場，但埋單計數喺今季聯賽上陣10場有七次正選，都算唔錯，可惜嘅係始終未來能取到第一個澳職入球。
計埋前身昆士蘭獅吼，布里斯班獅吼贏過三次常規賽冠軍之餘，亦喺2008/09同10/11球季贏過兩次季後賽總冠軍，今次以常規賽一姐強勢出戰，自然希望可以一搔七年之癢。季後賽周六就開打，獅吼會喺下周日先登場，喺準決賽主場迎戰墨爾本城，爭逐晉級一星期之後上演嘅決賽。