除了謝霆鋒一家四口遊獅城度歲外，其實不少圈中人均趁過年團圓，如楊千嬅黐丁子高、陳小春攬應采兒、羅嘉良陪蘇岩、蔡少芬孖張晉等，眾人俱透過微博晒恩愛。
前日大年初一是楊千嬅37歲牛一，其夫丁子高在年三十晚特別在酒店為她舉行生日派對，夫婦既唱K又切蛋糕，十分甜蜜。千嬅昨說：「丁生搞生日會畀咗個surprise我，好開心，今年生日咁啱係大年初一，雙喜臨門呀！」昨日千嬅去了五個地方拜年，其中包括往周潤發夫婦家，她說：「噚日我仲返屋企同奶奶食生日飯，之後就招呼丁生同佢成班朋友嚟玩，搞到凌晨成點先忙完，勁過走埠登台。咁啱丁生家姐同佢契媽都係差唔多時間生日，所以噚晚我哋都有一齊慶祝，切完蛋糕玩魚蝦蟹，三個女人一齊都幾特別。」

羅嘉良過白色新年

千嬅留港度歲，另一對夫婦蔡少芬和張晉同樣在港，大肚的蔡少芬更將偕夫影賀年合照放微博與眾分享。羅嘉良和內地演員太太蘇岩則身在北海道過白色新年，兩人在當地嘆烤肉、玩滑冰、坐冰上電單車及冰上香蕉船等，相當盡興；至於陳小春和應采兒早前在內地工作時，曾抽空到浙江天台山觀光，現時兩人已於泰國蘇梅島享受陽光與海灘。
採訪：夏琴