薛家大少薛世恒早前接受訪問，苦笑謂，希望陳法拉她好，各方面都好，又謂，「會經過的，完全忘記佢，我做人會冇咗一部份。」但他也承認，與她的回憶，曾經影響他每一天。在另一個訪問中，被問及如果法拉有新對象，會祝福嗎？當然會。「佢嘅幸福係最緊要。」薛世恒說。

法拉現在很幸福。身處美國修讀戲劇的陳法拉，今年係最後一年。依家佢主要都係排練同演舞台劇，依家做緊一個，嚟緊十一月同明年二月又有兩齣，忙得不可開交，如果大家咁啱喺當地，仲可以購買門票入場欣賞法拉與同學嘅演出。

香港時間今日凌晨，放低劇本嘅法拉應邀出席Kate Spade 2018年春夏時裝展，一身紅色lace裙配杏色大褸，佢笑笑口話係「偷走出嚟」睇靚衫做大人，其間又與拍過美劇《白宮風雲》（The West Wing）及《廣告狂人》（Mad Men）嘅女星Elisabeth Moss合照，法拉話：「好開心見到Elisabeth，佢今年套《The Handmaid's Tale》係我最鍾意嘅電視劇之一，佢仲有問我喺Juilliard School讀書嘅情況。」

今次Kate Spade春夏系列以「Road Trip」為主題，好鍾意自駕遊嘅法拉話今年已經去咗兩次road trip，其中一次仲係同男朋友、曾任外交官嘅法籍型男司馬諾（Emmanuel Straschnov）一齊去。「一次係我做司機，6月同屋企人去咗加拿大6日。山區啲路唔易揸，加上一家大細，我係完全唔敢睇風景，專心揸車。」

第二次呢，就係同男朋友一齊去。「同男朋友去法國，今次佢做柴可夫，我可以專心欣賞郊外景色。」法拉話此行仲特登去當地鄉村為其執導嘅短片取景，所以多得男朋友做司機，令佢可以專注做好導演工作。

法拉仲話，今年聖誕會返港，仲話好掛住香港嘅一切。

加油啊！俾心機呀！