陳瀅今日穿着傳統和服現身元朗，為超市擔任揭幕嘉賓，並以日式食材製作盛丼飯。

首次穿着真正成人祭和服，陳瀅覺得吸引到大家欣賞目光，比起着泳衣更多，估不到包到實都有咁多目光，而髮型頭飾都好講究，頭花插喺邊都有規定。

噚晚中秋節，問到有冇兵約？佢話:「好Dry，同家人食飯，賞下月就好早瞓，乜都冇做，冇兵，邊度有得約？冰皮月餅就有。」佢呻自己幾慘，外界成日覺得佢好多人約、好多人追，其實就冇，唯有等去旅行先識到人，完成埋手頭劇集，佢會放假返加拿大探家人兼識朋友。

嚟緊22日係佢28歲生日，陳瀅希望申請到放假，佢話:「應該係一大班姊妹租間酒店房玩，我都係鍾意同女仔出街多啲，咁當然我一定有男性朋友。」記者提議佢啲姊妹送位肌肉男上房當禮物時，佢笑指就叫姊妹送呢份禮物，仲提議要識跳脫衣舞。