【成員6至10歲】Cousin Fung打造首支派台歌 Idol Junior表演唔怯場
Idol Junior
由6歲到10歲小朋友組成嘅Idol Junior,早前喺新蒲崗接受專訪,佢哋最鍾意就係唱歌、跳舞同Rap,最新推出首支派台歌《Imagine》,揾咗吳業坤好友Cousin Fung作曲、金牌監製Edward Chan坐陣。經理人公司仲計劃同佢哋出2、3首歌,不過一定要安排佢哋學校假期先派歌同宣傳,絕對唔會影響學業。
雖然佢哋年紀細細,但係表演起嚟都唔怯場,仲跳得好齊有晒隊形。受訪當日,佢哋就去咗party room邊玩邊「開工」,但係一叫埋位,個個唔使3秒就企定定。
早前為咗新歌《Imagine》入錄音室錄音,負責接受訪問嘅成員Julian、Summer同Elise都話好興奮同開心,不過就一啲都唔緊張。Elise話:「聽番自己把聲好好笑。」o依家嘅小朋友讀書加埋課外活動真係忙過大人返工,咁佢哋做左Idol Junior會唔會好忙?佢哋異口同聲就話:「唔會好忙,因為好似玩咁,好鍾意一齊玩。都會有拗交,不過冇人會理,我哋男仔同男仔玩、女仔同女仔玩。」
咁啲同學仔有冇搵你哋攞簽名?Summer就好搞笑咁話:「我唔會同啲同學share,驚畀人笑,我啲同學好煩架。」
至於點解佢哋有興趣做小藝人?Julian話因為最鍾意rap:「我會上youtube睇人哋rap,MC Jin(歐陽靖)好勁,好想好似佢咁,第時去美國、大陸都可以表演即興rap。」Elise就最鍾意跳K-pop,Summer就喜歡彈結他。
Idol Junior日前喺party room接受訪問。
成員Julian、Summer同Elise負責接受訪問。