政務司司長林鄭月娥噚日喺一個午餐會上，話仲尋找緊政改談判嘅出路，有同事介紹佢睇本《Getting to Yes》（圖）嘅書，講述談判技巧，繼而借題發揮話呢本係教人談判時不要鐵板一塊，寸步不讓；着眼利益，唔係立場；針對問題，唔針對人。呢番說話講畀中央聽啱啲囉。
不過八方記得，身為林鄭「姐姐」嘅新民黨立法會議員葉劉淑儀，經常喺立法會同記者吹水時都會介紹呢本名著，八方噚日搵葉劉，佢好自豪話佢30年前喺士丹福大學讀書時已經睇呢本書，相信係佢徒弟、家吓入咗政制局做政治助理嘅陳岳鵬介紹畀「妹妹」林鄭。葉劉話，最記得呢本書係達成共識嘅最高境界，係雙方都要有得着，任何一方都覺得冇屈服、冇畀人搵笨。