【暫時未想移民】宋熙年心郁郁做木村鄰居 500萬有複式單位筍盤
宋熙年
宋熙年今年7月離開無綫之後,一直忙個不停,除了與老公陳智燊加入YouTuber行列,傳過月賺20萬,最近更過檔香港開電視主持節目。早前,宋熙年在觀塘接受《蘋果》專訪時,談及她主持資訊節目《宜居住遊行》,在日本東京介紹當地的居住環境及樓市行情,此行令她對東京加深認識。近幾年,不少香港人會選擇在日本置業,宋熙年表示日本人很守護自己的文化傳統,所以如果要在當地租樓不是一件容易的事,她說:「想喺日本租層樓住,如果冇公司聘請,或者冇詳盡嘅資料,係唔會咁容易畀你租到樓,喺日本嚟講,買樓係容易過租樓,作為一個投資,佢哋係OK。」
拍攝時有個有趣之處,令宋熙年十分難忘,她表示曾走訪日劇天王木村拓哉的寓所,她說:「我哋去咗目黑區,好多製作人公司、廣告公司、模特兒公司都係開喺目黑區,而呢區亦係木村拓哉住嘅地方,佢屋企叫木村王宮,係一個唔知幾多千呎嘅屋。」
木村為免個人私隱暴露、太多fans在該區徘徊影響到鄰居,向Google申請將自己住處隱形,宋熙年原本亦冇預計會經過木村王宮,但她出路遇貴人:「有好多資深嘅經紀或者老街坊,佢哋淨係透露咗畀我哋知道喺邊條街,我哋行過就會知道係邊間屋,因為有個氣勢,我哋就路過佢屋企嘅前門望吓,係好宏偉,冇乜窗。其實我唔係木村fans,唔知點解會好興奮,變咗小粉絲,控制唔到自己,可以見識吓,都覺得幾特別,因為佢始終係一位好殿堂級嘅明星。」
問到目黑區樓價,宋熙年表示:「我自己最鍾意目黑區一個800幾呎、大約500幾萬港元嘅複式單位,相隔木村屋企只係兩條街,但木村屋企係大約2億港元,所以同一個區,唔代表你住唔到。」有沒有心郁想購入這間複式單位?宋熙年笑說:「有心郁郁,我真係有打畀老公,因為我哋之前喺澳洲睇樓,都鍾意兩層嗰啲屋,地方雖然唔大,但係有空間,所以同老公講,格局幾好,隔籬又係木村住,成個區好潮。佢問我係咪想買,我嗰刻就收番少少,因為我始終唔係太熟識日本呢個地方,又唔懂日文,所以投資去日本,我始終保守啲,但係好吸引。」
宋熙年坦言如果要在外地置業,首選都會選擇澳洲悉尼或英國,她說:「我哋分別喺嗰度長大,較為熟識啲。」過去數月,香港發生社會運動,有沒有移民念頭?她說:「我諗短期都唔會,因為我哋嘅工作基地都喺香港,小朋友又細,都唔想成日搬來搬去。」兒子Damon已1歲,現時返緊playgroup,有否想過將來讓他到外國升學?宋熙年說:「我哋生小朋友之前都有諗過,小朋友長大會去英國定澳洲讀,我老公話梗係英國啦,英國口音好聽啲,因為佢成日笑我啲澳洲英文口音!呢個係我哋一路都有諗嘅方向,但幾時過去就真係未仔細諗,因為我同老公啱啱轉去自由身,係搏殺期,以工作為主,反而諗緊我同老公呢個team點樣做得更加好,點樣拍多啲好嘅片。」
早前,他們一家三口接拍廣告,宋熙年坦言當時都有掙扎過,但幸好客戶十分遷就兒子的作息時間,她說:「基本上囝囝出現咗唔係好耐,佢瞓咗晏覺先,嚟到就玩,然後我哋再送囝囝返屋企先。我好感恩有客戶咁錫我哋一家人,Damon咁細個拍廣告,都係一個好好嘅美好回憶。」至於能否再一家三口接廣告,宋熙年直言再看緣份,因為一切都以兒子行先。會否讓兒子做童星?她笑說:「睇佢嘅興趣,除非佢自己好鍾意,同埋如果好短時間,我哋都OK,但現階段要佢拍電影、拍戲都唔會喇,因為囝囝生活好規律,夜晚7點要瞓覺,佢早瞓,我同老公就可以二人世界。」
很多家長都想子女入讀名校,但宋熙年反而以方便為首要條件,她說:「我唔想將讀書變成全家人嘅困擾,我哋希望free啲舒服啲,至於興趣班都要諗,呢個唔只淨係喺香港出現嘅現象,喺澳洲,都一樣要返興趣班、補習班、學琴,但始終都要睇Damon嘅興趣,佢而家就好鍾意車。」
採訪:黃曉妍
攝影:沈健程
攝錄:廖達燊
髮型:Nicole
[email protected] hair & nail
化妝:Sammy Lam
服裝:IRO
場地:The Stadium
-----------------------------
《2019高級珠寶鑑賞誌》
點擊即睇過百款鑽飾名錶 -----------------------------
【匿名港警爆大鑊】
韓國KBS時事節目《時事直擊:香港 被自殺》
一按即睇 宋熙年離開TVB變成自由身,最近有為香港開電視主持資訊節目。
宋熙年帶隊睇日本樓盤,有去過著名的目黑區,更行經天王木村拓哉的寓所。
宋熙年與老公陳智燊都變成自由人,再處身於博殺期,未有打算移民。
若果將來真的要在外地置業,宋熙年希望是澳洲或英國。
兒子Damon已1歲,兩公婆有考慮將來讓兒子到海外升學。(IG圖片)
Damon生活好規律,夜晚7點要瞓覺,之後可以兩公婆二人世界。(IG圖片)
木村拓哉為了私隱、避免騷擾鄰居,向Google地圖申請隱藏住處。