古天樂、鄭雪兒同陳漢娜今日喺觀塘為新片《殺破狼‧貪狼》接受訪問，佢哋喺戲中飾演一家三口，古仔表示同雪兒對上一次合作已經係2001年拍《尋秦記》嘅事，當時佢哋一個做項少龍，一個就做趙國公主倩兒，不過就最後畀連晉殺死，最後有緣無份。

講到今次合作，佢哋就話咁多年嚟一直都有同對方聯絡，古仔仲話：「今次拍呢部戲，咁啱播緊《創世紀II之天地有情》，而且雪兒又同葉偉信導演合作過《爆裂刑警》，所以今次搵佢演我老婆。」

事隔16年雪兒同古仔再度合作，雪兒話：「好自然、好舒服，再做番幕前唔會唔慣，因為大家又熟，佢都冇咩改變，同以前一樣。」講到古仔喺戲中要救女兒陳漢娜，陳漢娜話：「一直覺得好夢幻，我覺得古天樂好有型，有個咁有型嘅爸爸，喺現實中係唔可能發生，所以好幸福。」

今次古仔有唔少動作場面，佢表示見到動作導演洪金寶所設計嘅武打招式，睇到佢眼都跌出嚟，佢話：「入行以嚟，第一次咁多打，洪金寶大哥將佢嘅打法放喺我身上，我睇到眼都跌出嚟，後來逐步逐步嚟，喺現場訓練，都幾好玩，因為未試過。」提到古仔喺休息時，都拎住把刀訓練，佢話：「練動作，要記住招式，唔係做到嗰下就完成嗰個動作，要唔好穿崩、要有節奏、同對手要啱時間，Tony Jaa同吳樾練1、2次就埋位，但我練半日都未得，不過幾好吖，我0依家起碼掌握到。」