狼英競選期間開咗唔少空頭支票，苦主多到打晒蛇餅。之前狼英明明同「檔案行動組」話過，積極研究設立檔案法，點知佢7月上任之後，行動組想同佢坐低傾吓，約咗半年都未有回音，行動組主席、退休高院法官王式英越講越嬲：「以前好支持CY，𠵱家對佢好失望！」
前日政府答覆行動組成員何秀蘭書面提問，再爆狼英上任後銷咗60棟國金咁高嘅檔案，香港冇檔案法，換言之銷咗幾多重要檔案都奈佢唔何！王官話呀，政府仲將檔案法交畀法改會討論，即係根本冇心做，隨時拖多十年八載。行動組下周會見申訴專員協助檔案法調查，又會見檔案處，王官預告：行動不斷升級。