盧海鵬冇工開半退休 自認固執:對住蠢人會扯火鬧
盧海鵬通波仔半退休
盧海鵬日前接受苑瓊丹主持 香港 開電視節目《開工大吉77》的訪問,78歲的鵬哥在2018年底做完通波仔手術後,休息了一段時間,加上 疫情 的關係,甚少在幕前出現,直到近期疫情有緩和迹象,鵬哥才有限度現身,笑言「睇住苑仔大」的他,讚對方演技有進步:「我對住啲蠢嘅對手會扯火鬧人,我理得你喊唔喊,但係女仔我好少鬧嘅,惟有唔出聲囉!對住好朋友我就會講笑嘅,對住陌生人就唔出聲喇,之不過我個樣點樣嬲,大家都係覺得好笑嘅,你話係唔係死火!我有自己主見,啲人可能覺得我固執囉,好唔好相處就睇環境啦!」
鵬哥從小對演戲充滿興趣,當年入行一波多折,直到27歲從內地來港,最初因為「超齡」而不能報讀訓練班,幸好後來放寬了入讀年齡,鵬哥終於一償所願,最終與周潤發和吳孟達做同學,雖然當時簽約只得500蚊一個月,幾乎要靠積蓄過活,不過鵬哥依然把握每個演出機會:「當年做特約5蚊一集,我咪舉手做囉,因為我個樣惡,專搵呢啲角色畀我做,做得嚟又辛苦又難記,我咪試吓做喜劇演員,大家覺得幾好,咁就轉咗型喇。」
至於目前的生活,鵬哥笑指自己已經「半退休」:「有工開梗係想做啦,但係而家都冇嘢做,惟有退休啦!只要體力、能力做得嘅,都想做㗎,只係唔可以太大動作嘛。我從來冇攞獎夢,後生時就想攞錢,到後期都幾廿歲,攞到個獎證明呢行對我都有肯定,我乜嘢角色都做過晒,由細到大都鍾意做戲,做到個名出嚟,都可以話係得償所願。」
-----------------------------
英文版已登錄《蘋果》App,立即 下載/ 更新 : iOS / Android
-----------------------------
支持蘋果深度報道,深入社區,踢爆權貴,即Like 蘋果專題及調查組FB專頁 !