張堅庭今日參與奥海城The Sky影院播放《表姐，你好嘢！》後分享會，大談當年跟鄭裕玲合作點滴，原來當年係以鄭裕玲既獨立又毒辣作為角色藍本設計。佢本人冇諗過二十八年後，戲中故事近似現時社會討論話題，佢相信此戲話題未必再有人拍，因為好多相關題材都唔拍得。

講到Celine妹妹事件，佢覺得一位九歲大女孩唱得咁好係好難得，亦看得出Celine愛唱歌兼跟父親關係不錯，但張堅庭擔心當傳媒追問佢父親新聞時，Celine未必懂得處理，佢話「我覺得佢父親應該獨自處理，佢都算係公眾人物，如果個女想喺歌唱事業發展，佢可以出來回應問題，有錯咪道歉，公關步驟一二三，將個女唱歌同自己切割出來。」又表示若果繼續拖下去會好尷尬。