百五萬港紙可以買啲乜？洋樓？跑車？全部都唔係，答案係德國龍門簡尼喺今屆世界盃決賽用過嘅手套。
話說喺當日嘅比賽上，簡尼因為甩手而俾朗拿度射入，結果德國就以○比二輸波，並且造就巴西第五次成為世界盃冠軍。賽後，簡尼嬲到將手套除咗扔喺地吓，但唔知點解，就俾一位巴西球迷佩雷拉偷偷哋執咗，而佢重喺前日向巴西傳媒炫耀自己嘅戰利品。
佩雷拉話如果有人出得起二十萬美金（約百五萬港紙），佢就割愛咁話。之但係，我求大俠就唔係太睇好有人畀錢佢賺。𠵱家經濟環境唔好，球會冇錢買大牌球員，球員又俾人減薪，邊會有人願意用百五萬嚟買一對龍門手套呀！

活士唔係大晒㗎
大名鼎鼎嘅高球好手「老虎仔」活士邊個唔識，但有時啲嘢唔係指住個鼻就大晒㗎，好似噚日呢位仁兄去蘇格蘭嘅賽會備戰英國公開賽，就因為冇帶球員證，賽會嘅保安企硬唔畀佢入場，事後賽會保安部重行出嚟講，話之你係碧咸抑或活士，總之冇通行證就冇面畀。今次真係應咗個句「面係人畀，架就係自己丟嘅」！