被稱為中港政經界「鐵娘子」嘅行會非官守成員查史美倫，威水履歷又「加料」，香港滙豐銀行委任佢做非執行副主席。查太04年起做滙豐非執行董事，今次更上層樓，做獅子銀行第二位副主席，另一位係馮國綸。
查太今次「升職」，獅子銀行講到明畀個威水啲嘅銜頭佢，等查太代表滙豐喺中國行走江湖時，「更能準確反映其身份。」查太「升」做副主席，同時退任滙豐投資亞洲控股主席職務，不過獅子銀行冇提及查太「升職」後收幾多酬金。
八方搵過資料，滙豐以前都有過女士做副主席，就係港英殖民地年代權傾一時、甚至有可能做首任特首嘅女男爵鄧蓮如。
香港改朝換代，滙豐做生意都要識得走位，女男爵淡出遠走英倫，搵同北京有偈傾嘅「鐵娘子」助陣就最啱數嘞。