官中龍頭大哥皇仁書院，即日起至6月，趁校刊《黃龍報》創辦115周年玩大晒冷，喺中央圖書館搞咗個「百載黃龍——皇仁書院文獻展」，攞晒啲成百年嘅珍品出嚟同市民開心share！主角《黃龍報》記錄香港學界早年歷史同皇仁尖子表現，喺日佔時期因為皇仁停課一度停刊，至今出到109期，唔少舊生都話睇《黃龍報》大㗎。

皇仁佬齊齊回味那些年

《黃》創刊號首頁編者的話寫住，呢本係全球第一本中英雙語學校雜誌，不談政治無偏見，最緊要有趣同啟發人，歡迎全港中文學校訂購，皇仁仔投稿仲有稿費，創刊號定單喺印刷前已達800本。當年隸屬港英政府嘅官校都要效忠，1911年嘅《黃》為賀英國國皇喬治五世加冕，封面用套紅印刷，喜氣洋洋，內文又講吓加冕幾勁。同場仲有舊試卷、校章、作業本等展品。
1964年畢業嘅周一嶽，噚日同官場「骨精強」前保安司黎慶寧、前死因裁判官陳碧橋等參觀文獻展；周一嶽話自已掛住玩所以冇上過《黃龍報》。1968年畢業嘅黎慶寧睇《黃》資料時亦津津有味，仲話那些年係波牛，有次搶波俾肥仔壓斷手、送院扭返正左手，「叫到全瑪麗都聽到」。唱歌發燒友周一嶽話當年試過輸咗音樂比賽，都要黐埋冠軍隊再唱歌。佢仲想趁今年畢業50周年，叫埋同級老友籌獎學金幫吓師弟㖭！

歷年《黃龍報》

1899年創刊號

1906年彩色版

1953-54年隨便睇

李八方
mailto:[email protected]