達成集團(126)喺連雲港打造嘅商業物流項目,係華南城(1668)之後,第二隻金雞蛋,要實。達成連雲港物業項目(72%)已完成土地證辦理手續,面積660萬平方呎,每方呎樓面地價不過17蚊,仲平過一個巨無霸餐。真係係咁意計數,項目每方呎增值/獲利200大元,已經可以為達成總增值/獲利9.5億銀。達成最新市值,不過12.8億銀,項目潛在獲利增值,可以好肥仔。連埋達成其他內房項目重估,NAV上到3.80元,現價1.12元折讓講緊高達70.5%,吸引到痹。
達成2010年半年度純利3.9億銀,又當全年度都係呢個數額入賬,預期PE都係得3倍幾,炒達成業績,亦得。博達成現價翻半番到1.68元,重估後嘅NAV折讓,仍然高達56%,仲有大把收窄空間。