【新Game試玩】《FIFA 19》完全版 新玩法冇越位冇犯規入波要出場？
蘋果日報 2018/09/20 00:05
歐聯EA SPORTSFIFA 19
5月底先至推出完世界盃更新，轉眼間EA Sports又推出新一集《FIFA 19》，但年年都出新一集，仲有乜嘢新橋？首先第一賣點是《FIFA 19》從《PES》（《Winning Eleven》）系列上搶得歐聯版權，除了設有歐聯模式玩法之外，連安裝遊戲時都特別安排一場「虛擬」歐聯決賽祖雲達斯對巴黎聖日耳門畀大家先過下癮，有歐聯玩確實感覺良好咗。
遊戲正式版要到9月28日推出，但記者事先已取得完全版進行測試。除歐聯模式外，強化了的「The Journey: Champions」模式就在Alex Hunter外加入一男一女兩位主角，但EA事先話明相關內容暫不能透露，大家可以之後慢慢試。至於最受歡迎的「FIFA Ulimate Team」玩法基本上同之前都差不多，記者試玩得到3個球員包，除了利物浦史杜列治外，其餘大多數是能力值低球員，加上測試階段Transfer Market無好嘢，都係試玩一鋪就收手。
其實《FIFA 18》球員動作已做得好細膩，《FIFA 19》又有冇改良？最主要加入Active Touch系統改善First Touch時的表現，如可配合R1加R3鍵第一時間拖波過人或扮漏踢即時轉身，實試時確實都幾好用，亦易掌握。但相反今集加入了連按兩次射波掣，射波動作就唔易掌握，按第二掣時難以控制力度，都係用返傳統射波掣或加上R1的精準射球好過。
《FIFA 19》正式比賽已交足水準，不過有時玩遊戲唔使下下都咁真實，所以記者都好喜歡《FIFA 19》新加入的「特別玩法」。如「No Rules」玩法就無任何規則，無論是越位、手球、從後踢人以至批踭都唔會犯規，目的只有一個，就是將足球擺入對方龍門。近期好多大熱遊戲都加入「大逃殺」式玩法，估唔到連《FIFA 19》都有一個類似的「Survival」玩法，就係每入一球波，入波一隊就會隨機被趕走一個球員，即是越入得多波球員越少，令落後一隊有得追，記者試玩了兩鋪後，基本上勝負距離只有兩球，亦令高手唔可以再「數」對手，雖然脫離現實，但玩落又確實幾過癮。
記者：布偉倫
《FIFA 19》將於9月28日正式推出。
《FIFA 19》加入Active Touch系統改善First Touch時表現，不過要到尼馬這些星中之星球員先能做出特別動作。
初試FUT，介面比《FIFA 18》美觀，但因未正式公開，Transfer Market仍然無人可買。
在「No Rules」中從後剷人都無問題，只要入到波就算贏。
新玩法其實有5樣，不過最有挑戰性要算是大逃殺（Survival）及No Rules（暴力足球）。
今集慶祝入波招式都變得多咗，不過在大逃殺模式入波反而唔應該慶祝。
睇見麥巴比的表情，就應估到佢之前射失了一球必入球。