露雲娜今日喺新城接受節目「豐味旅程」訪問，順道宣傳新碟。

見到露雲娜清減咗唔少，佢就好開心咁話：「係呀，衫、褲都有鬆，尤其係着一條窄身牛仔褲，鬆咗好多，仲要用皮帶，好開心呀，我估瘦咗10磅，因為8月開始，我同老公經常都行山。」喺行山過程，露雲娜遇過佢最驚嘅嘢，佢話：「見到蛇，我驚到唔識郁，我同條蛇差距10步，老公叫我walk slowly，條蛇好似我手臂咁粗，其實我住西貢村屋，我教老公要冚厠所板。」

除咗行山，露雲娜喺飲食方面都好注重，佢表示：「老公同我一齊戒澱粉質、紅酒，你話抵唔抵錫吖，o依家淨係食菜同肉，我想瘦多15磅，因為我以前試過3餐都係食麥皮，肚餓就食蘋果，不過我見暈，雖然瘦得好快，但面色又唔好，又唔健康，老公同媽咪都會心痛，我亦都唔接受醫學美容。」此外，露雲娜透露現時正籌備第二張唱片，佢話：「今次呢隻碟反應好好，fans好錫我，畀我好多鼓勵同愛，令我有好多力，所以我都想搞歌迷會，其實以前歌迷寫信畀我，我都有回信，呢樣係媽咪教我。」