以127評分成為告東尼馬房鎮倉寶之一的「巴基之星」，周日（21日）將會列陣第八場沙田錦標1600米，告仔當然特別緊張，連續幾日每當「巴基之星」出圈操練，佢都全程跟出跟入。

今朝（19日）自然亦都唔例外，當「巴基之星」由助手策騎到內圈操練，告仔首先在飛機坪出口落操練指示，並於烽火台觀操後，返回馬房大閘口接馬。

兩項一級賽盟主「巴基之星」今季雖然係初出，但已做足操練工夫，近期連續在泥地試兩課大閘，今次憑新鮮感跑1600米，夥拍田泰安，絕對有能力同馬王「美麗傳承」硬撼。