網友mark2009響《香港討論區》以「十年前的十二月，你應該記得」為題，叫大家回憶吓當時嘅「好日子」。「1996年12月，打崩頭的新盤：帝庭園開平均1.2萬蚊呎、愉景新城開平均6300蚊呎、東港城開平均5000蚊呎，31/12/1996恒生指數收市13460點。」
27079242就覺得，比起日本，香港仲未算衰。「好過日本好多啦，人哋過多幾年就衰足廿年，股、樓同死。」
looklook334就話：「其實當年樓市要作深層及長時間調整，係有迹可尋嘅，只不過當時香港人太無警覺性唧。」睇怕佢當年都眼光獨到，冇淪為負資產。
最抵死係甲乙丙丁戌，佢叫網友們唔使懷念咁多，因為好快會再見到呢個情景。「睇吓家陣股票狂升，樓市聽講下年會再升20%，有啲更大膽話升50%！到時香港人又可以唔使做啦！」佢咁講法，唔知係咪即係話個樓市好快就好似97年咁，冧到落谷底呢？