呔巾大戰,公證人范太民望勁升,本可即時紮職,官拜人大常委,變身國家領導人,點知有阻滯,原常委黑面老曾,聲稱要「終生奉獻祖國」,被傳賴死唔肯交班!
好巧合哋,呢個時候,有關勢力人士,忽然向阿爺明篤范太,話呔巾之戰,范太向袋巾鬆章,兼向講緊嘢嘅煲呔截糊,對凸首態度不禮貌,以致袋巾水鬼得戚,即時升城隍!
咁就令人戥范太唔抵嘞!袋呔之夜,圓滿終場,全港市民睇住范太一邊一個,拖住呔巾兩個小男孩,笑住步下舞台,好似一個慈祥媽咪,喺幼稚園接一對仔仔放學,一個讀高班,一個低班,而媽咪就兩個都咁錫,充滿天倫溫馨,令人熱淚高呼:范太Bravo!
咁嘅表現點解唔可以做人大常委呢?至於大黑曾,一向講嘢火爆,狂鏟民主派,出位挺董,有時愛之足以害之,搞到五十萬大遊行,董伯腳痛玩完!不過話「終生奉獻」,語意抽象,老人家冇話到一定會賴死唔交位喎!唔做常委,一樣可以奉獻祖國,例如協助吓嚴打啲冒牌領呔各類A貨呀咁,大黑曾一定勝任有餘!
超然啲睇,莫講唔做人大常委,就算唔做人,都可以繼續奉獻祖國嘅!例如啱啱去咗冇幾耐嘅鄔老醫,唔知點解,佢生前晚年瘋狂抹黑煲呔,話煲呔品格有問題,好彩及早蒙主寵召咗!若果鄔醫公生勾勾到今日,會為煲呔連任,即是會為國家製造多幾多麻煩呢?鄔老去咗,從此收口,變咗永久沉默性挺煲呔,亦係對祖國嘅永久性貢獻吖!