今年認真旺嫁娶！繼黃曉明、Angelababy（楊穎）的喜宴日期曝光後，連經常有女埋身、現年53歲的金牌監製錢國偉（Wilson）與比他年輕20載的「雜果賓治」陳宛蔚（Calinda）的婚期亦有眉目了！據本報收到消息，原來二人已定於今年10月8日在尖沙嘴洲際酒店筵開逾50圍擺酒結婚，他們將跟黃曉明、Angelababy（楊穎）及盛品儒、蔡一鳳這兩對新人撞正同一日擺酒。其實Wilson於去年7月在美國向女友送上3卡鑽戒跪地求婚，隨後被發現於婚姻註冊處入紙排期註冊結婚。

準新娘開P慶祝

記者昨日致電恭喜Wilson，他笑笑口反問：「邊個講㗎？係book咗，但未confirm，未入紙㗎。」是否與曉明和盛品儒撞日擺酒？他說：「盛品儒我知，但Baby都係嗰日結婚咩？佢邊度擺？」得知曉明和Baby在上海擺酒後，Wilson似放下心頭大石謂：「哦，咁都好啲，唔係就索性轉日子嘞。」
問婚禮籌備進度如何？他說：「我𠵱家搞緊劇本，𠵱家交晒畀大人（指Calinda）去搞，開緊會遲啲講。」然後便匆匆掛線。
Wilson與好多圈中人熟稔，預計「古惑佬」鄭伊健和錢嘉樂都會「走唔甩」，齊齊做兄弟團，而準新娘子Calinda日前去了新加坡舉行婚前之旅，她的一位圈外好姊妹於facebook貼了多張相，並以英文留言，意譯：「為我們的準新娘Calinda Chan和Angel Fan告別單身！我們的婚前旅行不會令人失望。」見Calinda戴着小皇冠，與另一位同樣準備結婚的女性朋友，身上同戴住一條寫着「Brides to be」綵帶，一班人飲到面紅紅、醉醺醺，盡興一番。
採訪：嵐山