《少林足球》美上映爛尾唔益《功夫》
星爺遭荷李活片商賣甩 谷氣!
由周星馳自導自演的電影《少林足球》,在多個國家上映均大賣。當星爺雄心勃勃期待憑該片打開美國市場之際,買下電影版權的Miramax卻將上映日期一改再改,日前更有消息指影片會被抽起,改為發行DVD和錄影帶,令星爺進軍荷李活出師不利。
由周星馳導演及主演的電影《少林足球》,前年在港上映叫好叫座,大收約六千萬票房,該片在法國、韓國及日本等地的票房亦十分理想。
慎重其事
親赴美配英文對白
美國Miramax亦購下此片版權,打算安排作全國盛大放映,但上映日期卻一拖再拖,日前更有消息指Miramax有意將《少》片抽起,改為發行DVD和錄影帶,但亦有消息指Miramax為安撫星爺,或會在少數戲院上映《少》片。
星爺一直希望可開拓荷李活市場,而《少》片則被他視為重要的頭炮。為慎重其事,星爺早前專程飛到美國為影片配上英語對白及宣傳,可惜映期卻不斷更改,早前曾表示鐵定上周五公映,結果有關方面又說內容需作修改,映期要再度押後。
仍抱希望!
「因為唔信都冇用」
記者昨日聯絡身在上海的星爺,他在電話中回應說:「部戲賣咗畀Miramax,咁我哋之間係要互相信任,到今日為止我重相信佢哋會安排部戲喺美國上映嘅,不過有樣嘢我都唔係好明白,部戲喺每個地方上映都咁受歡迎,令發行商搵大錢,但美國嘅映期就要改五次,呢啲可能係佢公司策略,某程度上我要信佢哋同尊重佢哋,因為唔信都冇用,呢啲事已超出我可以控制嘅範圍。」
最近星爺所拍的新片《功夫》乃由哥倫比亞投資,該片明年在美國上映。若Miramax在《功夫》上映前,要為在美國仍是新人的星爺打開當地市場,宣傳《少林足球》的費用動輒數以千萬美金計,故在商言商,Miramax沒理由花大錢為其他競爭對手打江山。未知是否這個原因,令Miramax冷對《少》片。
不過,《少》片除在香港大賣外,在日本的票房亦收約二億港元、韓國收約四千萬港元、法國收約三千九百萬港元、意大利則收約一千二百萬港元,台灣收約一千五百萬港元及星馬收約一千一百萬港元。《少》片在各地均有不俗票房,但偏偏在美國卻受此冷待,難怪星爺心裏有氣。
擔心三毛!
「佢試過開工暈低」
此外,日前有報道指為星爺新片《功夫》擔任動作導演的洪金寶提出請辭,空缺由袁和平頂上,並指星爺與洪金寶在合作上出現很多意見分歧。昨日星爺就此回應說:「洪金寶其實係以身體唔舒服為理由同哥倫比亞請辭,而事實上喺上海拍戲嘅日子真係好辛苦,佢試過喺片場開工嗰陣嘔吐同暈低,血壓升到好高,我哋話送佢去睇醫生,佢都堅持要開工,當時我都幾感動。我同佢真係冇意見分歧,佢係一個我好欣賞嘅導演,佢辭職我覺得好可惜,不過我期望同袁和平嘅合作可以有火花。」
採訪:陳月媚
星爺早前到日本宣傳《少》片時,大受當地觀眾歡迎。 資料圖片