究竟孫柏文搞邊科？噚日孫柏文Whatsapp覆番華華，話今次飲大咗上節目，係因為有好親嘅長輩過身，佢去飲解穢酒。華華勸佢唔好再飲嘞，佢就話會「trymybest」。至於係咪一如報道講，炒期銀輸大錢，喺有線又係咪冇得留低，佢就冇回應。華華再打電話畀佢，孫柏文已經閂機唔聽電話。
有線新聞財經主任顏寶剛同華華講，「暫時都唔會（同佢）合作，我哋用人係睇個人表現同團隊合作，嗰日你睇番都知咩事。」
早排，華華都有約過孫柏文去飲酒，當時佢好堅決話唔去，要決心戒酒咁話。唔通今次係因為至親長輩過身，太過悲傷先破戒？華華同孫柏文係行家，又係舊同事，加上佢屋企有白事，所以唔會落井下石，只係想祝福孫柏文，今日喺邊度跌低，第二日就喺邊度起番身啦！