謝玲玲同囡囡林心兒噚晚出席Isobar Bellissima Italian文化節，謝玲玲就話兩年前都係帶林心兒嚟呢個活動，問到佢哋鍾唔鍾意意大利文化?謝玲玲稱鍾意食意大利菜，心兒就話：「爸爸都有開意大利餐廳，今年自己都係美麗意大利文化節委員之一，幫手去宣傳意大利文化與藝術，等香港人知道當地文化。」

心兒又話細個媽咪已經帶佢去過意大利好多次，上年10月都去咗羅馬，去食意大利菜，覺得嗰度啲fashion好靚，問佢會唔會好忙?心兒稱上個星期開始，政務司司長林鄭月娥要搞個opening，自己都唔怕辛苦，學吓嘢先，又喺爸爸林建岳旗下寰亞公司工作做電影嗰邊，佢續言：「對電影及娛樂嗰邊有興趣，讀書唔係讀電影，不過都鍾意睇電影。

心兒坦言喜歡做幕後，喜歡睇人哋創作，每樣都學吓，謝玲玲又話囡囡心兒做演員，有啲年紀比較大，o依家啲演員都好後生開始做，不過唔會反對囡囡演出，睇佢對邊一方面有興趣，只係目前心兒未有興趣。此外，講到另一個囡囡林恬兒大肚，就嚟生B，謝玲玲就話好開心，第二次做外婆喇，不過唔肯透露BB嘅性別，話要等恬兒自己講，被問想唔想有個女孫，咁可以湊成個「好」字，佢講：「希望啦!」

同場有名模Ana R.見佢身穿束腰連身裙，有啲肚凸凸，疑似再有喜，又著平底鞋，Ana R.話係一個美麗嘅誤會，因為佢之前喺屋企湊B整到腳趾尾，所以著平底鞋，不過Ana R.都想追多一個，不過就等囡囡大啲，識講嘢再問吓佢，最好有兩、三歲年齡相隔，感覺會似好友，唔想兩個小朋友年紀相差太遠，又容易照顧，嚟緊11月2日係囡囡生日，會喺屋企搞細型BBQ派對，同準備蛋糕。