宋仲基今日又來港，應邀到將軍澳邵氏影城出席DiorHomme時裝騷，活動8點幾開始，但宋仲基近9點半先至由中環四季酒店出車，10點先至到；反而赤西仁近9時已到喇。

現場星光熠熠，包括楊千嬅、何超瓊、日本模特兒KojiMoriya、榮文蔚、甘國亮、林德信、竇驍，同近日與柯震東夜蒲攬攬的何超蓮亦有到場。

超蓮甫現身即問佢係咪拍拖？佢話:「唔係，我單身。」咁同柯震東呢？影埋你俾佢手勢純熟咁箍頸攬實喎，超蓮謂:「只係挨埋去啫，冇攬實。搞到媽咪都誤會我，仲訓話，我下次會檢點啲。」

啲人話你收好多兵喎……女神梗係收兵0架啦，但超蓮謙稱:「唔係兵，係朋友。」柯震東追你？「唔覺，我去台灣玩，佢盡地主之誼。佢好好人，我都唔好意思累到佢。」

再問超蓮可介意男方曾涉毒走歧途？超蓮稱:「我認識佢嘅時候，嗰啲事都已經成為過去。每個人都有過去，都會改過。佢人品好好，作為朋友，真係好好。」

咁係咪好似報道咁講，超蓮因為柯震東同李毓芬分手，才陪他買醉開解？超蓮就話柯震東無提分手一事，兩人平時見面都唔會無啦啦講感情事。急澄清與柯震東只係朋友，可是因為擔心嚇走其他追求者？超蓮沒好氣地謂:「我唔係好似你哋所講嘅咁多追求者，只係普通朋友，搞到好尷尬，所以要澄清。」