毫無疑問港股已經進入亢奮階段，明明內地CPI超預期，港股只係跌少少之餘，個股仲炒到飛起，睇嚟個市一日未有見頂訊號都繼續炒落去，等到RSI頂背馳先鬆人。
低殘股份識得突破就自動開Turbo，其中隻長興國際（238）可以留意。呢隻股舊年5月底開始回購股份，買到9月尾開始停手，股價亦開始築成底部，反覆靠穩，12月響1.80元附近橫行，近兩三個星期成交慢慢增加，股價逐步上升。噚日下晝股價試過一吓搶升，即市成交大增，試車味濃，睇嚟都準備開車。從事男仕服裝零售嘅長興國際，喺2010年11月上市，當時有利郎（1234）、利邦（891）呢啲男裝股爆升護航下，以內需概念掛帥招股，招股價高達4.60元，預測市盈率20倍以上。
上市過後，股價無以為繼，最高升到6.31元，其後有跌無升，舊年10月初最低見1.46元，昨收市價2.16元，仍然殘到不得了。
長興本身經營迪萊（V.E.Delure）同鐵獅丹頓（Testantin）兩個自家品牌，前者高檔啲，主攻中年男仕市場，後者低檔次啲。自營店同特許經營店收入大約五五之比，未來公司打算做多啲自營店業務。
長興舊年上半年業績並無不妥，純利升25.6%至8838萬元人民幣，每股盈利9分。收入升33.3%至3.32億元人民幣，毛利率靠穩喺66.9%。比較唔好嘅係，舊年上半年長興嘅存貨周轉天數升到320天，較09年251天水平上升。

舊年下半年內地消費保持可觀增長，按道理長興期內收入增長表現仍偏穩，而下半年亦係銷售旺季，假設下半年盈利較上半年增長兩成，市盈率大概9倍，同樣經營自家男仕西裝品牌嘅利郎，券商預測2011年市盈率13.5倍，至於內地銷售國際品牌男服嘅利邦，預測市盈率更達22.6倍，反映長興估值大幅折讓於同業。
細價低殘股當中，長興盤生意穩穩陣陣，仲有內需概念，9倍PE真係人棄我取。既然長興圖表夠靚，呈上升趨勢兼成交增加，短線有追利邦、利郎落後嘅能力，以12倍PE作為目標價，中線睇2.87元，即略低過250日線水平，現價跌一成止蝕。
晉佳
本欄逢周一、三及五刊出